Pintura, Eskultura, Ilustrazioa, Marrazketa, Komikia, Beste batzuk. Bilbao

José Ibarrola Bilbon jaio zen, 1955ean. Agustín Ibarrola eskultorearen semea da eta guztiz
prestakuntza autodidakta izan du. Ibilbide zabal eta polifazetikoa garatu du, eta, pinturaz eta
eskulturaz gain, beste zenbait jarduera ere landu izan ditu; besteak beste, ilustratzaile,
eszenografo, zuzendari artistiko edo diseinatzaile gisa aritu izan da.
1990ean, Moyua plazan egiten ari ziren Bilboko Metroaren lanen itxitura diseinatu zuen.
Zuzendari artistiko gisa, 1999an, Ramón Barearen Pecata minuta antzezlanean hartu
zuen parte, eta egile beraren Bambulo eta El hombre que confundió a su mujer
con un sombrero (2001) lanetan ere aritu izan zen; hain zuzen ere, horiek dira bere
eszenografia esanguratsuenetako batzuk. Prentsarako egin dituen binetak ere oso ezagunak
dira, eta, besteak beste, ohiko kolaboratzailea da El Correo egunkarian.
Bere lanean eragin eta baliabide espresibo ugari nabarmentzen dira, eta bere etengabeko
izaera errealista eta figuratiboa ere agerian geratzen da. Gainera, mundu metaforikoak islatu
ohi ditu, eta kontzientziari buruzko hausnarketara eramaten du ikuslea.



José Ibarrola [2019ko azaroak 25].