Julio Ortun Bilbon jaio zen 1947an. Gaztea zela Bizkaiko Akuarelisten Elkartean hasi zen eta
bertan Manuel Balsa "El Ruso" margolaria izan zuen maisu bezala. Hirurogeita hamargarren
hamarkadaren erdialdera eskualdeko pintura lehiaketa askotan parte hartu zuen zeintzuetan
hogei saritik gora irabazi zituen. Aldi berean, bere lehen banakako erakusketak aurkeztu
zituen Bilbon, Algortan eta Gasteizen. 1983an Equipo Arte Independiente sortu zuen Justo
Sanfelices, Richard, Alejandro Quincoces, Roberto Zalbidea, Iñaki Zarate eta J.M. Rozasekin
batera eta talde-erakusketa ezberdinak jorratu zituzten laurogei eta laurogeita hamargarren
hamarkadetan.

Arlo teknikoan bere margolanak espresionismo eta naturalismoaren arteko eremuan kokatzen dira.
Madrileko Eskolako artista batzuen errealismo naturalista gogoratzen du bere obran, zeinetan
euren osagarri naturalekin ondo konbinaturiko horiak, gorri-horiak eta buztin koloreak biziki
nabarmentzen diren. Paisaiak, natura hilak eta kutxak, oholak eta zaborrak itxurazko nahas-
mahasean harmonikoki ageri diren konposizioak pintatzen ditu. Azken hauetan motibo piktorikoa
zehatzago mugatuz lorturiko hurbiltasun berezi bat azaltzen da. Bere teknikaren ezaugarri
nagusia trebetasun handiz egindako marrazketa irmoa da, zeinetan pintzelkada motzeko eta
egitura zainduko pinturak enpaste leunekin bat egiten duen.

Azken urteotan Ortunek bertako galerietan jarraitu du batez ere erakusketak egiten.